Balakən rayonunda heyvana qarşı qəddar davranış iddiası sosial şəbəkələrdə hiddət doğurub.
Shimal.News məlumat verir ki, kənd sakini Carulullah Rəhim oğlu Seyidovun həyətinə daxil olan itə balta ilə çoxsaylı xəsarətlər yetirdiyi iddia edilir.
Şahidlərin bildirdiyinə əsasən, yaralı heyvan həyətdən güclə çıxaraq yıxılıb və huşunu itirib. Ətrafdakı insanların köməyi ilə o, rayon baytarına çatdırılıb. Ona ilkin tibbi yardım göstərilib və tikişlər qoyulub.
Buna baxmayaraq, heyvanın vəziyyəti ağır olaraq qalır və daha geniş, peşəkar tibbi dəstəyə ehtiyac olduğu vurğulanır.
Hadisə ilə bağlı polis əməkdaşları tərəfindən araşdırma aparıldığı, əməli törətdiyi iddia olunan şəxs barəsində qanunamüvafiq tədbir görüləcəyi bildirilib.
Hadisə yerinə yaxın ərazidə yaşayan qonşular xəsarət alan itin son dərəcə mülayim və insanlara öyrəşmiş olduğunu deyirlər. Sakinlər belə halların cəzasız qalmamasını, əks halda zorakılığın daha da artacağından narahat olduqlarını bildirirlər.
Xatırladılır ki, "Azərbaycan Respublikası İnzibati Xətalar Məcəlləsi"nin 274-cü maddəsinə əsasən, heyvanlara rəhmsiz davranaraq onları şikəst etməyə görə 500 manat məbləğində cərimə nəzərdə tutulur. Lakin ictimaiyyət bu cəzanın yetərli olmadığını, daha sərt tədbirlərin tətbiqini tələb edir.
Eyni zamanda, səlahiyyətli qurumlardan yaralı heyvana operativ və peşəkar tibbi yardımın təşkil olunması xahiş olunur.
