Qəbələ rayonunun Topbağ kəndində yaşayış üçün infrastrukturun demək olar ki, mövcud olmaması sakinləri çıxılmaz vəziyyətdə qoyub. Daha doğrusu, Bakıya və rayon mərkəzinə axın etməyə məcbur edir.
Shimal.News-a daxil olan məlumata görə, rayon mərkəzindən 30 kilometr aralıda yerləşən kəndə aparan yol uzun illərdir əsaslı şəkildə təmir olunmur.
Sakinlərin sözlərinə görə, kəndə gedən yol indiyədək asfaltlanmayıb, yalnız 2015–2016-cı illərdə çınqıl örtüyü salınıb. Yağıntılı havalarda yol keçilməz hala düşür, nəqliyyatın hərəkəti çətinləşir. Rayon rəhbərliyinin kəndə səfəri planlaşdırılanda müvafiq qurumlar tərəfindən yoldakı çalalara "əl gəzdirilir", sonra eyni vəziyyət davam edir.
Topbağ əhalisinin əsas məşğuliyyəti əkinçilik və heyvandarlıqdır. Lakin yolun və qaz təminatının olmaması sosial vəziyyəti daha da ağırlaşdırıb.
"Kənd camaatı əsasən təsərrüfatla məşğuldur, amma şərait olmadığı üçün cavanların çoxu buranı tərk edib", – deyə sakinlər qeyd ediblər.
Bildirilib ki, Azərbaycan Avtomobil Yolları Dövlət Agentliyinə, yerli bələdiyyəyə və icra nümayəndəliyinə dəfələrlə müraciətlər olunsa da, problem həllini tapmayıb.
Qeyd edək ki, 2005-ci ildə inzibati ərazi vahidi kimi formalaşan Topbağ kəndində 2009-cu ilin siyahıyaalınmasına görə 532 nəfər əhali yaşayır. Kənddə 117 təsərrüfat, 460 hektar yararlı torpaq sahəsi mövcuddur. Fındıq bağları, əkin sahələri və heyvandarlıq kənd iqtisadiyyatının əsasını təşkil edir.
Sakinlər aidiyyəti qurumlardan yolun əsaslı təmir olunmasını və kəndin qazlaşdırılmasını xahiş edirlər.
