Quba–Xaçmaz avtomobil yolunda şaxta ilə bağlı qabaqlayıcı tədbirlərin görülməməsi sürücülərin narazılığına səbəb olub.
Shimal.News-a məlumat verən sürücülər bildiriblər ki, havanın kəskin pisləşəcəyi əvvəlcədən məlum olsa da, yolun təhlükəsizliyi üçün zəruri tədbirlər görülməyib. Bu isə insan həyatını ciddi təhlükə altına atıb.
Sürücülərin sözlərinə görə, şaxta və güclü külək olacağı əvvəlcədən proqnozlaşdırılsa da, ən çox istifadə olunan Quba–Xaçmaz yoluna qum və ya duz səpilməyib. "Dünən axşam artıq vəziyyət aydın idi. Avtomobillər maksimum 20 km/saat sürətlə hərəkət edirdi. Buna baxmayaraq, səhər saatlarında da sürücülər eyni buzlu yola çıxmağa məcbur qaldılar", – deyə vətəndaşlar bildiriblər.
Hazırda Qubadan Xaçmaza qədər olan yolun buz bağladığı qeyd olunur. Bildirilir ki, yalnız ödənişli yolun üzərində yerləşən körpüdə qum-duz qarışığı səpilib. Sürücülər məsul qurumların vəziyyətə müdaxilə etmədiyini iddia edirlər.
