Xəbər verdiyimiz kimi, iyunun 17-də Moskvanın "Sadovod" ticarət mərkəzi yaxınlığında pilotsuz uçuş aparatının (PUA) qəlpələrinin düşməsi nəticəsində iki Azərbaycan vətəndaşı yaralanıb.
Bizim.Median-nın məlumatına görə, zərərçəkənlərdən biri – Şəki rayonunun Kiçik Dəhnə kənd sakini, 35 yaşlı İslam Qabil oğlu Süleymanov baş verən hadisənin təfərrüatlarını danışıb.
O bildirib ki, 2013-cü ildən "Sadovod" bazarında çalışır və hadisə günü həmkarı Elnur Nəbiyevlə birlikdə güclü partlayışın təsirinə məruz qalıb.
"Səs eşitdik, pəncərədən baxanda bazarın yandığını gördük. İçəri buraxmırdılar, dronlar uçurdu. Evə qayıtmaq üçün körpüyə çıxmışdıq ki, birdən yanımızda nəsə partladı. Gözümüzü açanda yerdə idik. Özüm qalxanda gördüm ki, Elnurun vəziyyəti ağırdır, mənim isə üzümdən qan axır", – İslam Süleymanov deyib.
Onun sözlərinə görə, hadisədən sonra yoldan keçən avtomobillərdən biri onları polis əməkdaşlarının yanına çatdırıb, daha sonra isə təcili tibbi yardım vasitəsilə xəstəxanaya aparılıblar.
Müayinələr zamanı məlum olub ki, qəlpələr onun sinə, qol, çiyin və üz nahiyəsinə xəsarət yetirib. Alın hissəsindəki qəlpə çıxarılsa da, çənəsində hələ də qəlpə qalıb. Bundan əlavə, qulaq pərdəsinin yırtıldığı müəyyən edilib.
İslam Süleymanov bildirib ki, daxili orqanlarında zədə aşkarlanmayıb və hazırda həyati təhlükəsi yoxdur. Həkimlər qulaq pərdəsinin bir ay ərzində sağalmayacağı təqdirdə cərrahi müdaxilənin lazım ola biləcəyini qeyd ediblər.
Onunla birlikdə yaralanan Elnur Nəbiyev isə hadisə günü xəstəxanadan evə buraxılıb. Bildirilir ki, onun qolunda sinirə yaxın yerləşən bir qəlpə hələ də qalır, digər qəlpələr isə çıxarılıb.
Hazırda hər iki zərərçəkən ev şəraitində müalicələrini davam etdirir.
