Xaçmaz şəhərinin mərkəzi hissəsinə yaxın ərazilərdəki bəzi küçələrin yolları yararsız vəziyyətə düşüb.
Report.az-ın məlumatına görə, sakinlər bildiriblər ki, İzmayilovka yaşayış massivinin Vəli Məmmədov, Gəray Əsədov, Mirzə Kazımbəy və Dağıstan küçələrində yollar qəzalı vəziyyətdədir.
Rayon mərkəzindəki bəzi küçələrə yeni asfalt örtüyü çəkilsə də, qeyd olunan küçələr əsaslı təmir işlərindən kənarda qalıb. Sakinlər bildiriblər ki, bu onlara müəyyən çətinliklər yaradıb, şəhər mərkəzinə gediş-gəlişləri çətinləşib.
Sakinlər vurğulayıblar ki, yağıntılı hava şəraitində piyadaların palçıqlı yolda hərəkəti bəzən mümkünsüz olur. Belə bir şəraitdə məktəblilərin də qayğıları daha da artır. Məsələ ilə bağlı aidiyyəti qurumlara dəfələrlə müraciət isə nəticə vermir.
Xaçmaz Rayon İcra Hakimiyyəti başçısının şəhər üzrə nümayəndəliyindən bildirilib ki, sözügedən küçələrin mövcud problemindən xəbərdardırlar. Şəhərdaxili küçələrin təmiri mərhələli şəkildə davam etdirilir.
Məlumatda həmçinin vurğulanıb ki, Dağıstan küçəsi bu il, digər üç küçə isə növbəti 2026-cı ildə asfalt olunacaq.
