Xaçmazın şəhid Rəhim İmamov küçəsində keçid olmadığına görə sakinlər dəmir yolundan keçmək məcburiyyətində qalırlar.
“Xezerxeber.az”ın məlumatına görə, ərazidə yaşayan sakinlər bildirirlər ki, əvvəl burada körpü olub və uzun illər oradan istifadə ediblər. Lakin bir müddət əvvəl körpü qəzalı vəziyyətə düşərək uçub. Ancaq o vaxtdan dəfələrlə müraciət olunsa da, körpü bərpa edilməyib. Sakinlər hələ də təhlükəli dəmiryol xəttinin üzərindən keçməyə məcbur olurlar.
Məsələ ilə bağlı "Azərbaycan Dəmir Yolları" Qapalı Səhmdar Cəmiyyətinindən bildirilib ki, sözügedən dəmiryol körpüsünün kənarı ilə çəpərləmə aparılması planlaşdırılıb. Həmçinin piyadaların təhlükəsiz keçidi üçün pilləkənin quraşdırılması nəzərdə tutulub.
İllər öncə İzmayılovka kimi tanınan ərazinin sakinləri “Shimal.News”a dəmir yolunun üzərindən keçidin olmasının vacibliyini bildrimişdirlər. Onlara vəd verilməsinə baxmayaraq körpünün lazımi yerdə tikiləcəyinə inanmadıqlarını bildirmişdirlər:
“Burada 300-dən çox ev var. İnsanlar hər gün dəmir yolunu keçməli olurlar. Düzdür, yerüstü piyada körpüsü tikilir, lakin o, buradan çox uzaqdır. Məktub yazdıq, cavab gəldi ki, baxılıb köməklik göstəriləcək. Amma başqa mənbədən öyrəndik ki, heç bir körpü olmayacaq”.
