Xaçmaz rayonunda şəhərlərarası sərnişindaşıma ilə bağlı narazılıq yaranıb.
Patrul.az-ın məlumatına görə, bununla bağlı videogörüntülər sosial şəbəkələrdə yayılıb.
İddialara görə, avtobus sürücüsü yalnız özünün satdığı biletlərin sahiblərinə nəqliyyat vasitəsinə minməyə icazə verib. Onlayn bilet alanlara isə yer olmadığını deyilib.
Oxu.az-ın məlumatına görə, Azərbaycan Yerüstü Nəqliyyat Agentliyinin (AYNA) mətbuat katibi Tural Orucov məsələ ilə bağlı açıqlama verib:
"İlkin mərhələdə müəyyən anlaşılmazlıq yaranıb, lakin məsələ operativ şəkildə öz həllini tapıb. Belə ki, vətəndaş növbəti avtobusa bilet əldə edib və həmin nəqliyyat vasitəsi ilə təyinat nöqtəsinə çatdırılıb".
Shimal.News məlumat verir ki, Xaçmaz Avtovağzalından Bakıya hərəkət edən avtobuslarla bağlı ciddi narazılıqlar uzun müddətdir ki, diqqət mərkəzindədir. Məsələn, bilet üzərində göstərilən avtobus nömrəsi ilə real hərəkət edən nəqliyyat vasitəsi arasında uyğunsuzluq, son anda "sənin avtobusun dəyişdirilib" deyilərək sərnişinlərin yolda saxlanılması, Bakıdan yola düşən avtobusların yolboyu sərnişin yığaraq Xaçmaz və Xudat ərazisində insanları düşürüb, daha sonra isə reysin davam etməyəcəyini bildirmələri, bir oturacağın bir neçə nəfərə satılması, onlayn bilet alan sərnişinlərin məcburi şəkildə bileti qaytarmağa və yenidən nağd ödəniş etməyə məcbur edilməsi, qiymətlərin tarifdən artıq olması sakinlərin ciddi narazılığına səbəb olur.
