Regionlarda çalışan stomatoloqlar TƏBİB-in kütləvi ixtisar qərarına etiraz edirlər. Həkimlər bildirirlər ki, bir sıra rayonlarda onlarla stomatoloq işdən çıxarılıb, bəzi bölgələrdə isə yüz minlərlə əhaliyə cəmi 2–3 həkim xidmət göstərir.
Etiraz edən stomatoloqlar ixtisarların əsassız olduğunu, maaşların aşağı, iş şəraitinin isə qeyri-qənaətbəxş olduğunu deyir və qərarın ləğvini tələb edirlər. Onların sözlərinə görə, bu məqsədlə bir neçə dəfə TƏBİB-in binası qarşısında aksiya keçirilib.
Zaqatala rayonundan olan stomatoloq Ülkər Qazıyeva bildirib ki, rayonda vəziyyət kritik həddə çatıb. Onun sözlərinə görə, 130 min əhalisi olan Zaqatalada 22 stomatoloqdan 19-u ixtisar edilib və cəmi 3 həkim saxlanılıb. "130 min əhaliyə 3 stomatoloqun xidmət etməsi nə dərəcədə düzgündür? 34 illik iş stajı olan həkimlərin ixtisarı ədalətsizdir", – deyə o vurğulayıb.
Stomatoloqlar qeyd edirlər ki, oxşar vəziyyət İsmayıllı, Ağsu və digər rayonlarda da müşahidə olunur. Bildirilir ki, 82 min əhalisi olan Ağsuda cəmi 6 stomatoloq fəaliyyət göstərir, rayonda isə ümumiyyətlə özəl stomatoloji klinika yoxdur. Mütəxəssislərin hesablamalarına görə, bu rayonlarda real ehtiyac mövcud kadr sayından bir neçə dəfə çoxdur.
Xaçmaz rayonundan olan stomatoloq Aydın Rəşidov isə bildirib ki, 184 min əhalisi olan rayonda 27 stomatoloq var və onların da ixtisarı nəzərdə tutulur: "Biz maliyyələşdirilmirik, materialları və hətta assistentin maaşını özümüz ödəyirik. Aylıq 1200–1800 manat ödəniş tələb olunur, verilən maaş isə cəmi 531 manatdır".
TƏBİB isə açıqlamasında bildirib ki, stomatoloji xidmətlərin böyük hissəsi icbari tibbi sığortaya daxil deyil, bəzi regionlarda xidmət keyfiyyəti və pasiyent qəbulu aşağıdır, maliyyə səmərəsizliyi mövcuddur. Bu səbəbdən optimallaşdırma aparıldığı qeyd olunub.
Məlumata görə, regionlar üzrə ümumilikdə 1140 stomatoloqun ixtisarı planlaşdırılır. Həkimlər isə bu qərarın regionlarda stomatoloji xidmətlərin iflic olmasına və mövcud böhranın daha da dərinləşməsinə səbəb olacağını bildirirlər.
