Əslən Ağsu rayonundan olan, SOCAR-ın sabiq vitse-prezidenti Mikayıl İsmayılovun oğlu Orxan İsmayılzadə ilə bağlı uzun illərdir davam edən atalığın müəyyən edilməsi və aliment mübahisəsi yenidən Ali Məhkəmənin icraatına çıxarılacaq.
Bakı Apellyasiya Məhkəməsinin son qərarından narazı qalan Orxan İsmayılzadə növbəti dəfə kassasiya şikayəti verib.
Beləliklə, illərdir müxtəlif məhkəmə instansiyalarında davam edən bu ailə mübahisəsi yeni mərhələyə qədəm qoyub. İş üzrə indiyədək birinci instansiya, apellyasiya və Ali Məhkəmə mərhələləri dəfələrlə təkrarlanıb.
Məhkəmə materiallarında Orxan İsmayılzadənin dəfələrlə təyin edilən DNT ekspertizalarında iştirak etmədiyi, aliment ödənişi ilə bağlı problemlərin yarandığı, hətta aliment borcuna görə əmlakına həbs qoyulduğu və barəsində axtarış qərarlarının çıxarıldığı barədə məlumatlar yer alıb.
Son kassasiya şikayətində müdafiə tərəfi iddia edir ki, məhkəmələr Mülki Prosessual Məcəllənin 97.5-ci maddəsini düzgün tətbiq etməyiblər. Vəkillərin sözlərinə görə, Orxan İsmayılzadə DNT ekspertizasından qərəzli şəkildə yayınmayıb və 2026-cı il martın 13-də ekspertiza müəssisəsinə getsə də, ekspert iş yerində olmadığı üçün müayinə baş tutmayıb.
Müdafiə tərəfi hesab edir ki, atalıq yalnız DNT ekspertizasının nəticələri ilə müəyyən edilə bilər və telefon danışıqları, fotoşəkillər, tərəflərin münasibətləri kimi dolayı sübutlar bioloji atalığın təsdiqi üçün kifayət etmir.
Şikayətdə alimentin məbləği də mübahisələndirilir. Bildirilir ki, aylıq 500 manat aliment təyin edilərkən cavabdehin rəsmi gəlirlərinin olmaması lazımi şəkildə nəzərə alınmayıb.
Məlumata görə, bu günədək iş üzrə 8 dəfə DNT ekspertizası təyin edilib və Orxan İsmayılzadəyə rəsmi bildirişlər göndərilsə da, onun həmin ekspertizalarda iştirak etmədiyi bildirilir.
Qeyd edək ki, Ağsu əsilli sabiq SOCAR vitse-prezidenti Mikayıl İsmayılovun oğlunun adı hallanan bu məhkəmə işi artıq Azərbaycan məhkəmə sistemində ən uzun sürən ailə mübahisələrindən biri hesab olunur. Ali Məhkəmənin növbəti qərarının prosesə yekun qoyub-qoymayacağı isə yaxın vaxtlarda məlum olacaq.
Mənbə: Pravda.az
