Bu gün Şimal bölgəsindən olan şəhidlər - Rahib Hacı-İsmayılov, Elgün Quliyev və Məhəmməd Xəlillinin doğum günüdür.
Rahib Məmmədəmin oğlu Hacı-İsmayılov 1991-ci il sentyabrın 17-də Şəki şəhərində anadan olub. Sentyabrın 30-dan könüllü olaraq döyüşlərə qatılan Rahib Tərtərin Tülkü Dərəsi, Qapanlı və Ballı Qaya istiqamətlərində gedən döyüşlərdə iştirak edib. Daha sonra Ağdərə istiqamətində döyüşən igidimiz oktyabrın 20-də Ağdərənin azadlığı uğrunda gedən ağır döyüşlərdə şəhid olub.
O, ölümündən sonra "Vətən uğrunda", "Suqovuşanın azad olunmasına görə" və "Cəsur döyüşçü" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Elgün Vasif oğlu Quliyev 1992-ci il sentyabrın 17-də Şamaxı rayonunun Göylər kəndində anadan olub. O, 1998-ci ildə T.Kərimov adına Göylər kənd 2 nömrəli tam orta məktəbin birinci sinfinə daxil olub. Sonrakı illərdə İsmayıllı və Şəki şəhərlərində orta məktəb təhsilini davam etdirib.
Elgün Quliyev 2008-ci ildə Şəki İslam Kollecindən məzun olub. 2010–2014-cü illərdə Sumqayıt Dövlət Universitetinin Tarix fakültəsində "Tarix müəllimliyi" ixtisası üzrə təhsil alıb.
2014-cü ildə müddətli həqiqi hərbi xidmətə çağırılan Elgün Quliyev 2014–2015-ci illərdə Azərbaycan Silahlı Qüvvələrinin Füzuli rayonunda yerləşən "N" saylı hərbi hissəsində xidmət edib.
2020-ci ildə müəllimlərin işə qəbulu imtahanından keçərək Lerik rayonunun Sors kəndində müəllim kimi fəaliyyətə başlayıb. Həmin il sentyabrın 27-də başlayan Vətən müharibəsi zamanı könüllü olaraq Şuşanın azadlığı uğrunda gedən döyüşlərə qatılıb. Elgün Quliyev noyabrın 9-da Şuşa döyüşləri zamanı şəhid olub. O, Şamaxı rayonunun Göylər kəndində torpağa tapşırılıb.
Elgün Quliyev ölümündən sonra "Vətən uğrunda", "Füzulinin azad olunmasına görə", "Şuşanın azad olunmasına görə" və "Döyüşdə fərqlənməyə görə" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Məhəmməd İlqar oğlu Xəlilli 2004-cü il sentyabrın 17-də İsmayıllı rayonunun Basqal qəsəbəsində anadan olub. O, orta təhsilini Binəqədi rayonunun Biləcəri qəsəbəsində yerləşən 299 saylı məktəb-liseydə alıb.
Azərbaycan Silahlı Qüvvələrinin hərbi qulluqçusu olan Məhəmməd Xəlilli 2023-cü il sentyabrın 19-da keçirilmiş lokal xarakterli antiterror tədbirləri zamanı Xocavənd rayonunun Qarakənd kəndi istiqamətində gedən döyüşlərdə şəhid olub.
O, ölümündən sonra "Vətən uğrunda" medalı və 3-cü dərəcəli "Vətənə xidmətə görə" ordeni ilə təltif edilib.
