Bu gün igid şəhidlərimiz - Tural Ağcabəyov, Mirzəcan Orucov və Bəhruz Tağızadənin doğum günüdür.
Tural Təbriz oğlu Ağcabəyov 14 sentyabr 1987-ci ildə Xaçmaz rayonunun Manafoba kəndində anadan olub. Manafoba kənd məktəbində orta təhsil alıb. Təhsilini başa vurduqdan sonra Azərbaycan Silahlı Qüvvələrinin sıralarında xidmətə çağırılıb.
Azərbaycan Silahlı Qüvvələrinin kiçik çavuşu olan Tural Ağcabəyov 20 sentyabr 2023-cü ildə keçirilən lokal xarakterli antiterror tədbirləri zamanı Ağdərə rayonunda şəhid olub.
Mirzəcan Araz oğlu Orucov 14 sentyabr 2001-ci ildə Şamaxı rayonunun Sis kəndində anadan olub. Subay idi.
Mirzəcan Orucov 2020-ci ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin "N" saylı hərbi hissəsində xidmət edib.
Azərbaycan Ordusunun əsgəri olan Mirzəcan Orucov 2020-ci il sentyabrın 27-də başlayan Vətən müharibəsində Suqovuşanın və Xocavəndin azadlığı uğrunda gedən döyüşlərdə iştirak edib. O, oktyabrın 7-də şəhid olub. Şamaxı Şəhidlər Xiyabanında dəfn edilib.
Mirzəcan Orucov ölümündən sonra "Vətən uğrunda", "Xocavəndin azad olunmasına görə" medalları və III dərəcəli "Vətənə xidmətə görə" ordeni ilə təltif edilib.
Bəhruz Azər oğlu Tağızadə 14 sentyabr 1999-cu ildə Qax rayonunda anadan olub.
Azərbaycan Ordusunun əsgəri olan Bəhruz Tağızadə 2020-ci il sentyabrın 27-də başlayan Vətən müharibəsində könüllü olaraq iştirak edib. Cəbrayılın, Füzulinin, Hadrutun və Şuşanın azadlığı uğrunda gedən döyüşlərdə vuruşub. Bəhruz Tağızadə 7 noyabr 2020-ci ildə Şuşa istiqamətində döyüş tapşırığını yerinə yetirərkən şəhid olub. 16 noyabr 2020-ci ildə dəfn edilib.
O, ölümündən sonra "Vətən uğrunda", "Cəsur döyüşçü", "Şuşanın azad olunmasına görə" medalları və III dərəcəli "Vətənə xidmətə görə" ordeni ilə təltif edilib.
