Bu gün şəhidlərimiz - Cəmil Məmmədli, Mayis Səmədov və Əhməd Laçınovun doğum günüdür.
1999-cu il iyulun 28-də İsmayıllıda anadan olan Cəmil Məmmədli orta təhsilini Bakı şəhərində alıb, daha sonra Azərbaycan Texniki Universitetini bitirib. 2020-ci ilin iyulunda hərbi xidmətə yollanan Cəmil Vətən müharibəsi başlayanda könüllü şəkildə ön cəbhəyə göndərilməsini istəyib. Füzulinin azadlığı uğrunda gedən döyüşlərdə iştirak edən qəhrəman oktyabrın 14-dən 15-nə keçən gecə Dördçinar kəndi istiqamətində gedən döyüşlərdə şəhidlik zirvəsinə ucalıb.
Şəhid Cəmil Məmmədli ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə", "Cəsur döyüşçü" medalları və 3-cü dərəcəli "Vətənə xidmətə görə" ordeni ilə təltif edilib.
1977-ci il iyulun 28-də Xaçmaz rayonunun Qadaşoba kəndində anadan olan Mayis Səmədov uzun illər Daxili Qoşunlarda xidmət edib. Xüsusi təyinatlı dəstənin istehkamçısı olan gizir Vətən müharibəsi zamanı Cəbrayıl və Füzuli istiqamətlərində gedən döyüşlərdə iştirak edib. O, 2020-ci il oktyabrın 5-də Füzuli döyüşlərində şəhid olub.
Mayis Səmədov ölümündən sonra "Vətən uğrunda" və "Cəbrayılın azad olunmasına görə" medalları ilə təltif edilib.
1999-cu il iyulun 28-də Zaqatala rayonunun Yuxarı Çardaxlar kəndində anadan olan Əhməd Laçınov 2019-cu ildə hərbi xidmətə çağırılıb. Xüsusi Təyinatlı Qüvvələrin əsgəri kimi Vətən müharibəsində Murovdağ, Cəbrayıl və Füzuli istiqamətlərində gedən döyüşlərdə iştirak edib. Əhməd Laçınov 2020-ci il oktyabrın 3-də Füzuli döyüşləri zamanı şəhid olub.
Əhməd Laçınov ölümündən sonra "Azərbaycan Bayrağı" ordeni, "Vətən uğrunda", "İgidliyə görə", "Füzulinin azad olunmasına görə", "Cəbrayılın azad olunmasına görə" və "Kəlbəcərin azad olunmasına görə" medalları ilə təltif edilib.
