Ölkə əhəmiyyətli yollardan biri sayılan M5 Yevlax-Zaqatala-Gürcüstan ilə dövlət sərhədi magistral yolunun qalan hissəsinin nə vaxt bərpa olunacağı vətəndaşları narahat edir.
Bizim.Media-nın məlumatına görə, yolun ümumi uzunluğu 164 kilometrdir. Onun 46 km-lik Xaldan-Şəki və 40 km-lik Zaqatala-Balakən-Mazımçay hissəsi yenidən qurulsa da, qalan hissələri uzun illərdir təmir olunmayıb.
Magistral yolun indiki durumu tək Şəki, Qax və Zaqatala sakinləri deyil, o cümlədən, bu yoldan istifadə edən digər sürücülər üçün də çətinliklər yaradır.
Şəki-Zaqatala rayonlarını əhatə edən 80 km-ə yaxın hissəsi nə təhlükəsizlik, nə də texniki baxımdan tələblərə cavab vermir.
Magistralın Zaqatala rayonunun Qımır kəndindən şəhərə kimi olan hissəsində bir neçə körpü var. Bu körpülərin dar olması bir təhlükədirsə, onun asfaltının dağılması isə tamam başqa bir problemdir.
Hazırda yolun bərbad olduğu Şəki-Qax-Zaqatala hissəsində bu rayonların əsas yaşayış məntəqələri yerləşir. Digər tərəfdən sözügedən rayonların kənd təsərrüfatı məhsullarını istehsal edənlərin də əksəri bu yoldan istifadə edir.
Sərnişindaşıma ilə məşğul olan Yunus Murtuzov avtomobili qarşıdakı çala və çuxurdan yayındırmaq istəsə də nail ola bilmir və maşını kənara verib saxlayır:
“Baxın, əksər yerdə vəziyyət belədir. Maşınlar tez-tez sıradan çıxır, yolun sağı-solu çuxurdur, maşının ehtiyat hissələrinin hər gün demək olar təmirə ehtiyacı olur”, - deyir.
Magistralın təmirə ehtiyacı olan hissəsi ilə bağlı Azərbaycan Avtomobil Yolları Dövlət Agentliyindən bildirilib ki, 2018-ci ildə magistralın Zaqatala-Balakən-Mazımçay hissəsi əsaslı şəkildə yenidən qurulub. 2021-ci ildə isə Xaldan-Şəki hissəsinin yenidən qurulması Agentlik tərəfindən həyata keçirilərək yekunlaşdırılıb. Yolun Şəki-Zaqatala hissəsinin yenidən qurulması da nəzərdə tutulub. Bununla bağlı hazırlanan layihə aidiyyəti üzrə təqdim olunub və dövlət proqramına salınıb. Sözügedən hissənin əsaslı şəkildə yenidən qurulması yaxın gələcəkdə təmin olunacaq.
Belə çıxır ki, vəsait ayrılması gözlənilir. Bu nə zaman baş verəcəyi isə bəlli deyil. O zamana kimi sürücülər özlərini qorumalı, avtomobillərini ehtiyatla idarə etməlidir ki, az zərər çəksinlər.
