2025-ci ilin oktyabr ayından etibarən mal-qara arasında dabaq xəstəliyinin yayılması ilə əlaqədar ölkə üzrə fəaliyyət göstərən heyvan satışı bazarları bağlanıb.
Hazırda bir sıra bazarlar açılsa da, Şimal bölgəsində yerləşən Xaçmaz rayonunun yeganə və ən böyük bazarının qapıları hələ də bağlıdır.
Bu vəziyyət fermerləri çətin vəziyyətə salıb.
"Heyvanlarımızı bazara çıxarıb sata bilmirik. 500 manatlıq qoyuna 300-350 manat verirlər. Çünki bazar yoxdur, rəqabət də yoxdur. Satışımız sıfıra enib. Arpamız, otumuz bitir. Heyvanımı hara aparıb satım ki, bu məhsulları ala bilim?!", – deyə fermer Səbuhi Nəzərov bildirib.
Mövcud vəziyyətlə bağlı Azərbaycan Qida Təhlükəsizliyi Agentliyindən qeyd edilib ki, ölkə üzrə indiyədək 10-a yaxın heyvan satışı bazarı yenidən qurularaq fəaliyyətə başlayıb və həmin bazarlarda müasir infrastruktur yaradılıb:
"Hazırda Xaçmaz və daha bir neçə heyvan bazarında da intensiv təmir və rekonstruksiya işləri aparılır. İşlər yekunlaşdıqdan sonra sahibkarın müraciəti əsasında Agentliyin qiymətləndirmə komissiyası tərəfindən bazara baxış keçiriləcək və yekun rəy verildikdən sonra həmin bazarın fəaliyyətinin bərpası məsələsinə baxılacaq".
