Son illərdə tibb müəssisələrinin maddi-texniki bazasının gücləndirilməsi, icbari tibbi sığortanın tətbiq dairəsinin genişləndirilməsi ilə yanaşı, insan kapitalına qoyulan yatırımlar da ardıcıl xarakter alıb. Bu siyasətin məntiqi davamı olaraq, dövlətimiz tərəfindən həkim və tibbi heyətin əməkhaqqının artırılması istiqamətində növbəti addım atılıb. Belə ki, TƏBİB sistemində çalışan tibb işçilərinin əməkhaqları Birinci vitse-prezident Mehriban Əliyevanın təşəbbüsü və Prezident İlham Əliyevin tapşırığı ilə əhəmiyyətli dərəcədə artırılıb. Dövlət rəhbərliyinin səhiyyə işçilərinin əməyinə verdiyi yüksək dəyərin və insan amilinə göstərdiyi diqqətin təzahürü olan bu addım tibb heyətinin sosial müdafiəsini daha da möhkəmləndirəcək.
Əməkhaqlarının artırılması ölkəmizin hər yerində olduğu kimi, Şəki Rayon Mərkəzi Xəstəxanasında da tibb heyəti tərəfindən böyük sevinclə qarşılanıb. Ömrünün 26 ilini səhiyyə sisteminə həsr edən, insanların sağlamlığı keşiyində dayanan İlhamə Mütəllibova bu illər ərzində xəstəxananın müxtəlif bölmələrində çalışıb. Bir neçə dəfə özəl xəstəxanalardan yüksək maaşla iş dəvəti alsa da, öz doğma iş yerini tərk etməyi düşünməyib.
Baş tibb bacısı bildirir ki, dövlətimizin qüdrətini, millətin həmrəyliyini Aprel döyüşlərində, 44 günlük Vətən müharibəsində və sonrakı dövrdə bir daha əminliklə hiss edib. Həmin günlərdə İlhamə Mütəllibova və onun komandası da ayıq-sayıq çalışaraq yaralıların müalicəsinə, sakinlərin sağlamlığına tez qovuşmasına səy göstəriblər. Eyni zamanda, yaralıların, şəhid ailələrinin daim yanında olub, onların psixoloji gərginliyinin aradan qaldırılması üçün fədakarlıqla xidmət ediblər.
İlhamə Mütəllibova göstərilən yüksək qayğıya görə Birinci vitse-prezident Mehriban Əliyevaya və Prezident İlham Əliyevə Şəkinin bütün tibb heyəti adından minnətdarlığını bildirib, bundan sonra da insanların sağlamlığı keşiyində layiqincə dayanacaqlarını vurğulayıb.
Mənbə: Azərtac
