Şəkinin zəngin milli-mədəni irsi və qədim sənətkarlıq ənənələri elmi ekspedisiya çərçivəsində araşdırılır.
AMEA A.A.Bakıxanov adına Tarix və Etnologiya İnstitutu ilə Şəki Regional Elmi Mərkəzinin birgə təşkil etdiyi ekspedisiya Şəki və ətraf şimal-qərb rayonlarını əhatə edir.
Araşdırmalar zamanı arxaik folklor, ailə dəyərləri, məişət və geyim mədəniyyəti, sənətkarlıq ənənələri, multikultural mühit və dialekt xüsusiyyətləri öyrənilir.
Ekspedisiya üzvləri Şəkinin məşhur şəbəkəçilik, təkəlduzluq, dulusçuluq və ipəkçilik sənətlərini, həmçinin Balakən və Qax rayonlarında qədim məişət nümunələrini araşdırır. Yaşlı sakinlərdən XIX əsrin sonu – XX əsrin əvvəllərinə aid geyimlər, bəzək əşyaları və məişət əşyaları ilə bağlı məlumatlar toplanır.
AMEA-nın Tarix və Etnologiya İnstitutunun şöbə müdiri İlhamə Məmmədova bildirib ki, Şəkidə fəaliyyət göstərən sənətkarlar milli ənənələri yaşatmaqla Azərbaycanın zəngin mədəni irsini gələcək nəsillərə ötürürlər.
Ekspedisiya rəhbəri Tahir Şahbazov isə Baş Layısqı kəndində yerləşən tarixi yaşayış evinin və Şin kəndindəki qədim su dəyirmanının qorunmasının vacibliyini vurğulayıb. Onun sözlərinə görə, bu abidələr milli memarlıq və məişət tariximizin dəyərli nümunələridir.
Araşdırmalar Kiş kəndində də aparılıb. Burada qədim yaşayış evləri, milli memarlıq üslubu və məişət əşyalarının bu günə qədər qorunub saxlanıldığı müəyyən edilib.
Toplanan nadir eksponatların gələcəkdə yaradılması nəzərdə tutulan Etnologiya Muzeyində nümayiş etdirilməsi planlaşdırılır.
