Şəkinin Böyük Dəhnə kəndində yerləşən transformatorlardan birinin təhlükəli vəziyyətdə olması əhalinin narahatlığına səbəb olub.
Ərazidə yerləşən transformatorun ətrafında heç bir qoruyucu hasar yoxdur və yüksək gərginlikli elektrik naqilləri açıq şəkildə əlçatandır. Transformatorun işlək vəziyyətdə olduğu səsindən də aydın hiss olunur.
Kənd sakinlərinin sözlərinə görə, xüsusilə uşaqlar üçün ciddi təhlükə yaranıb. Onlar bildirirlər ki, transformator məktəbə gedən yolun yaxınlığında yerləşir və hər an bədbəxt hadisə baş verə bilər.
"Uşaqları tək buraxmağa qorxuruq. Naqillər açıq vəziyyətdədir. Buradan həm məktəblilər, həm də mal-qara keçir. Transformatorun ətrafı mütləq hasarlanmalıdır", – sakinlər deyiblər.
Məsələ ilə bağlı "Azərişıq" ASC-dən bildirilib ki, hazırda Böyük Dəhnə kəndində elektrik şəbəkəsinin yenidən qurulması və kabelləşmə işləri aparılır. Layihə çərçivəsində yeni dirəklər basdırılır, xətlər çəkilir, transformatorlar və sayğaclar quraşdırılır.
Qeyd olunub ki, vətəndaşların müraciətindən asılı olmayaraq sözügedən transformator da yenilənəcək və müasir təhlükəsizlik tələblərinə uyğun şəkildə dəyişdiriləcək. Bildirilir ki, işlərin 40–45 gün ərzində başa çatdırılması planlaşdırılır.
