Şəkidə Mədəniyyət Nazirliyinin təşkilatçılığı ilə növbəti möhtəşəm musiqi tədbiri baş tutub.
Shimal.News xəbər verir ki, Bakı şəhərini və regionları əhatə edən mədəni qastrol proqramı çərçivəsində M.Maqomayev adına Azərbaycan Dövlət Akademik Filarmoniyasının Azərbaycan Dövlət Xalq Çalğı Alətləri Orkestri iyunun 24-də Şəki şəhərində konsert proqramı ilə çıxış edib.
Şəki şəhər Heydər Əliyev Mərkəzində keçirilən tədbirdə şəhər rəhbərliyi, musiqisevərlər və ictimaiyyət nümayəndələri iştirak ediblər.
Bildirilib ki, layihənin əsas məqsədi ölkə üzrə vahid mədəni məkanın formalaşdırılması, Azərbaycan mədəniyyətinin zəngin irsinin bölgələrdə təbliği, klassik və müasir musiqimizin daha geniş auditoriyaya çatdırılmasıdır.
Əməkdar artist İlahə Hüseynovanın dirijorluğu ilə keçirilən konsertdə əvvəlcə Üzeyir Hacıbəylinin "Koroğlu" operasından "Cəngi" əsəri səsləndirilib. Solist Orxan Soltanov olub.
Proqram çərçivəsində tamaşaçılar Fikrət Əmirov, Vasif Adıgözəlov, Şəfiqə Axundova, Polad Bülbüloğlu, Bəhram Nəsibov, Süleyman Ələsgərov, Arif Məlikov və Emin Sabitoğlunun əsərlərini, eləcə də Əməkdar artistlər Almaz Orucova, Xəyyam Məmmədov və digər solistlərin ifasında xalq mahnılarını dinləyiblər.
Qeyd olunub ki, qastrol proqramı "Azərbaycan Mədəniyyəti – 2040" Konsepsiyası çərçivəsində regionlarda mədəniyyətin əlçatanlığının artırılması və paytaxtla bölgələr arasında mədəni əlaqələrin möhkəmləndirilməsi məqsədilə həyata keçirilir.
