Şəkidə avtoyuma məntəqəsində müştəri ilə işçi arasında yaranan mübahisə dava ilə nəticələnib.
Shimal.News-un məlumatına görə, hadisə şəhərin M.F.Axundov küçəsindəki obyektdə baş verib.
Məhkəmə materiallarına əsasən, şəhər sakini Eldar (ad şərti) avtomobilini yuduzdurmaq üçün avtoyuma məntəqəsinə gəlib. Obyektin işçisi İbrahimə (ad şərti) xidmət haqqını ödəyə bilməyəcəyini bildirib. Lakin İbrahim әvvәllәr dә maşının yuyulmasına görә olan borcunu qaytarmadığını deyərək, pulunu tələb edib.
Bu zaman tərəflər arasında əvvəlki borcla bağlı mübahisə yaranıb. Mübahisə zamanı təqsirləndirilən Eldar zərərçəkmiş İbrahimə yumruq zərbələri endirərək ona bədən xəsarətləri yetirib.
Şəki Rayon Məhkəməsində keçirilən iclasda Eldar əməlini etiraf edib, peşman olduğunu bildirib. O, zərərçəkmişlə barışdığını və dəymiş ziyanı tam ödədiyini deyərək iş üzrə icraata xitam verilməsini xahiş edib.
Yekun qərara əsasən, Eldar cinayət məsuliyyətindən azad olunub və iş üzrə icraata xitam verilib.
Fidan İlqar
