Şəkidə Azərbaycanın qədim ipəkçilik ənənələrini yaşadan daha bir mədəni məkan – Kəlağayı Muzeyi fəaliyyətə başlayıb.
AZƏRTAC-ın məlumatına görə, muzeydə Şəki sənətkarlarının təbii boyalarla işlədiyi 100-dən çox kəlağayı nümayiş etdirilir. Eksponatlar arasında yaşı 300 ilə çatan nadir kəlağayı nümunələri də yer alır.
Muzey tarixi Şirin bəyin mülkündə yaradılıb. Burada ziyarətçilər yalnız qədim kəlağayıları izləməklə kifayətlənmir, həm də ipəkdən kəlağayı hazırlanmasının bütün mərhələlərini əyani şəkildə izləyə, ustad dərslərində iştirak edə bilirlər.
Muzeyin ideya müəlliflərindən biri Ruhiyyə Rəhimova bildirib ki, əsas məqsəd yerli və xarici turistlərə kəlağayının Azərbaycan mədəniyyətinin ayrılmaz hissəsi olduğunu göstərməkdir.
Onun sözlərinə görə, muzeydə nümayiş etdirilən eksponatlar arasında tarixi baxımdan xüsusi əhəmiyyət daşıyan, əsrlərdir qorunub saxlanılan Şəki kəlağayıları mövcuddur.
Şəki Regional Turizm İdarəsinin rəisi Şahin Məlikov isə bildirib ki, Kəlağayı Muzeyi artıq şəhərin turizm marşrutlarına daxil edilib. Buraya gələn turistlər həm qədim ipəkçilik ənənələri ilə tanış olur, həm də ustad dərsləri və milli mətbəx nümunələri ilə zəngin turizm təcrübəsi yaşayırlar.
Qeyd edək ki, Azərbaycan kəlağayı sənəti 2014-cü ildə UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilib və Şəki bu qədim sənətin əsas mərkəzlərindən biri hesab olunur.
