"Şəki Yaylası" istirahət mərkəzində iki nəfərin ölümü ilə nəticələnən faciə ilə bağlı yeni iddialar ortaya çıxıb. Təqdim olunan fotolar ziplayn avadanlığında əlavə qoruyucu sistemin istehsalçının nəzərdə tutduğu qaydada quraşdırılmadığına dair suallar yaradır.
Hadisə zamanı həyatını itirən şəxsin üzərində olan avadanlığın fotosunda iki halqanın rolikin alt hissəsinə, birinin isə əsas tros-xəttə bərkidildiyi görünür.
İddiaya görə, istehsalçının təlimatında əlavə qoruyucu kəmərin karabin vasitəsilə əsas trosu əhatə etməsi və rolikin üzərindəki xüsusi birləşmə nöqtəsinə bağlanması nəzərdə tutulur. Bu sistemin məqsədi rolikdə nasazlıq yarandığı halda şəxsin əsas trosdan asılı vəziyyətdə qalmasını və yerə düşməsinin qarşısını almaqdır.
Təqdim olunan görüntülərdə isə əlavə qoruyucunun kustar üsulla, iki yerə bölünmüş plastik boru və yastı iplə hazırlanmış konstruksiyaya birləşdirildiyi və əsas trosda əyləc mexanizmi kimi istifadə olunduğu iddia edilir. Hadisə zamanı rolik trosdan çıxdıqda məhz həmin plastik hissənin qopduğu bildirilir.
İddialara əsasən, eyni quraşdırma üsulundan "Şəki Yaylası"nda ziplayndan istifadə edən digər şəxslərin avadanlıqlarında da istifadə olunub.
Prokurorluğun materiallarında hadisə zamanı qopmuş bu konstruksiyanın "əlavə qoruyucunun zədələnməsi" kimi qeyd edildiyi bildirilir. Bu məlumatın texniki araşdırma zamanı təsdiqlənməsi halında isə məsuliyyət və təhlükəsizlik məsələləri ilə bağlı əlavə suallar yarana bilər.
Əsas suallar bunlardır: Əlavə qoruyucu sistem niyə istehsalçının təlimatına uyğun quraşdırılmayıb? Bu sistemi kim quraşdırıb? Quraşdırmaya kim nəzarət edib? Eyni üsul digər ziplayn avadanlıqlarında da tətbiq olunubmu?
Əgər təqdim olunan görüntülər və iddialar ekspertiza ilə təsdiqlənərsə, araşdırmanın yalnız rolikdə baş verdiyi ehtimal olunan texniki nasazlıqla məhdudlaşmaması və ziplaynın təhlükəsizlik sisteminin bütövlükdə araşdırılması məsələsi gündəmə gələ bilər.
Təqdim olunan məlumatlar və görüntülər hazırda iddia xarakterlidir. Onların texniki ekspertiza və istintaq nəticələri ilə təsdiqlənib-təsdiqlənmədiyi məlum deyil.
