Şəkidə yaşayan 71 yaşlı Dövlət Abdullayeva "Medera Hospital"da keçirdiyi əməliyyatdan sonra problemlərlə üzləşdiyini iddia edib.
Qadın sol ayağının əvəzinə sağ ayağının əməliyyat olunduğunu bildirib.
Şikayətçinin sözlərinə görə, o, uzun illərdir ayaqları ilə bağlı problem yaşayır və müxtəlif vaxtlarda bir ayağından səkkiz, digərindən isə altı dəfə əməliyyat olunub.
"20 ildir mən bu zülmdəyəm. Bir ayağımdan səkkiz dəfə, digərindən altı dəfə əməliyyat olunmuşam", – deyə Dövlət Abdullayeva bildirib.
Məsələ ilə bağlı "Medera Hospital"dan isə fərqli açıqlama verilib. Klinikanın məlumatına görə, Dövlət Əliqulu qızı Abdullayeva 2 dekabr 2022-ci il və 28 fevral 2023-cü il tarixlərində sol bud sümüyünün sınığı ilə bağlı əməliyyat olunub.
Klinikadan bildirilib ki, daha sonra xəstə həyat yoldaşı ilə birlikdə tibb müəssisəsinə dəvət olunub və rəhbərliklə mütəxəssislərin iştirakı ilə konsilium keçirilib. Travmatoloq Aqşin Məmmədov xəstəni müayinə edib və iki aylıq müalicə təyin olunub.
Açıqlamaya əsasən, müalicə başa çatdıqdan sonra xəstəyə klinikaya müraciət etməsi və əməliyyatın təmənnasız həyata keçirilməsi təklif olunub. Dövlət Abdullayevanın bununla razılaşdığı və daha sonra rayona qayıtdığı bildirilib.
"Medera Hospital"dan həmçinin qeyd edilib ki, bundan sonra Dövlət Abdullayeva və həyat yoldaşı müxtəlif dövlət qurumlarına müraciətlər ediblər və klinika həmin şikayətləri əsassız hesab edir.
Ailə isə əməliyyatı icra edən Gürkan adlı həkimin Türkiyəyə getdiyini və geri qayıtmayacağını bildirib. Həkimin özü və ya onun nümayəndəsinin bu iddialarla bağlı açıqlaması təqdim olunmayıb.
Hadisənin təfərrüatları və tərəflərin açıqlamalarını Baku TV-nin videosunda:
