Bakı şəhərində Beyin Olimpiada Mərkəzi tərəfindən təşkil olunan "Paskal" riyaziyyat olimpiadasında Şəki məktəbliləri uğurlu nəticələri ilə seçiliblər.
Shimal.News xəbər verir ki, Şəki şəhər Kimya-Biologiya təmayüllü liseyin VII "A" sinif şagirdi Həzi Aslanov maksimum – 100 bal toplayaraq "diamond" medal qazanıb. O, daha əvvəl də AMO, SASMO, Kopernik və digər beynəlxalq olimpiadalarda iştirak edərək ümumilikdə 15 qızıl, 4 gümüş və 1 bürünc medal əldə edib.
Bundan savayı Şəki Şəhəri Fizika, Riyaziyyat və Humanitar Fənlər Təmayüllü Liseyin IX "A" sinif şagirdi Məmmədov Cəsur Ceyhun oğlu da olimpiadada yüksək nəticə göstərərək I yerə layiq görülüb və qızıl medal qazanıb.
Eyni zamanda, Şəki şəhər 5 nömrəli tam orta məktəbin III "A" sinif şagirdləri də yarışda uğur qazanıblar. Duyğu Çelik gümüş, Həsənov Yunus isə bürünc medal əldə edib. Bu nəticələrdə şagirdlərin müəllimi Nəzakət Qədirovanın əməyi xüsusi qeyd olunur.
Bundan başqa, Şəki şəhər 17 nömrəli tam orta məktəbin V "C" sinif şagirdi Vəliyeva Akifə də "Paskal" riyaziyyat olimpiadasında gümüş medal qazanaraq II yerə layiq görülüb.
Qeyd edək ki, Şəki məktəblilərinin bu uğurları regionda təhsilin inkişafı və şagirdlərin beynəlxalq səviyyəli bilik və bacarıqlara yiyələnməsinin göstəricisi kimi qiymətləndirilir.
