İsmayıllı rayonunda şəkər xəstələrinin həkim qəbuluna düşməkdə çətinlik çəkməsi narazılığa səbəb olub.
Xezerxeber.az-ın məlumatına görə, Rayon Mərkəzi Xəstəxanasında lentə alınan görüntülərdən aydın olur ki, vətəndaşlar saatlarla növbə gözləməli olurlar.
Onların sözlərinə görə, şəkər xəstələrinin sayı çox olsa da, onları qəbul edən həkimlərin sayı məhduddur və bu da sıxlığa səbəb olur.
Bildirilib ki, dövlət tərəfindən dərman təminatı vaxtında həyata keçirilsə də, onların paylanması zamanı uzun növbələr yaranır. Bundan əlavə, xəstəxanada otaqların kiçik olması və bir neçə həkimin eyni otaqda fəaliyyət göstərməsi qəbul prosesini daha da ləngidir.
Məsələ ilə bağlı xəstəxanadan bildirilib ki, sıxlıq əsasən vətəndaşların eyni vaxtda müraciət etməsi, qəbul otaqlarının sayının məhdudluğu və bəzi hallarda növbə qaydalarına riayət olunmaması ilə bağlıdır. Qeyd olunub ki, vəziyyətin yaxşılaşdırılması üçün əlavə təşkilati tədbirlər görülür.
