Şabran rayonu Dəvəçi kənd tam orta məktəbinin mövcud vəziyyəti valideynlər və kənd sakinləri arasında narahatlıq yaradıb.
Sakinlərin Shimal.News-a bildirdiyinə görə, məktəbin dam örtüyü yararsız haldadır. Yağışlı havalarda sinif otaqlarına və dəhlizlərə su damır. Divarlarda kif müşahidə olunur, üfunət ətrafı bürüyüb. Bu şəraitdə normal tədris prosesi mümkün deyil.
Onlar onu da əlavə ediblər ki, binanın daxili vəziyyətini görüntüləməyə məktəb rəhbərliyi icazə vermir. Uşaqlar bu məktəbdə təhsil almaqla yanaşı, sağlamlıqlarını da riskə atmış olurlar.
Problemlə bağlı hansı quruma müraciət edəcəklərini bilməyən sakinlər məsələnin ictimailəşdirilməsi üçün mediaya üz tutublar. Valideynlər aidiyyəti strukturlara və Elm və Təhsil Nazirliyinə müraciət edərək bildirirlər ki, hər bir uşağın təhlükəsiz və sağlam şəraitdə təhsil almaq hüququ var.
Sakinlər ümid edirlər ki, məsul qurumlar məsələyə biganə qalmayacaq, Dəvəçi kənd tam orta məktəbində təmir işləri aparılacaq və şagirdlər normal şəraitdə təhsillərini davam etdirə biləcəklər.
