Sosial şəbəkələrdə Qax rayonunun İlisu kəndində yerləşən Ramramay şəlaləsinə gedən hər bir ziyarətçidən əlavə iki manat giriş haqqı alınması ilə bağlı iddialar yayılıb.
Məsələ ilə bağlı Ekologiya və Təbii Sərvətlər Nazirliyindən Shimal.News-un sorğusuna cavab olaraq bildirilib ki, Azərbaycan Respublikası Prezidentinin 14 iyul 2025-ci il tarixli Sərəncamı ilə İlisu Milli Parkı yaradılıb və Ramramay şəlaləsi həmin milli parkın ərazisinə daxil edilib.
"Bununla əlaqədar olaraq, əraziyə giriş milli parklar üçün müəyyən edilmiş qaydalara uyğun şəkildə bilet sistemi vasitəsilə tənzimlənir.
Milli park ərazilərində tətbiq olunan ödənişlər təbiət ərazilərinin mühafizəsinə, biomüxtəlifliyin qorunmasına, ekoturizm infrastrukturunun inkişafına və turist marşrutlarının saxlanılmasına yönəldilir.
Qeyd edək ki, Azərbaycan Respublikası Nazirlər Kabinetinin 21 aprel 2015-ci il tarixli 114 nömrəli Qərarına əsasən, milli parklara giriş haqqı hər bir ziyarətçi üçün 2 manat, avtonəqliyyat vasitələrinin dayanacaqla təmin edilməsinə görə isə 1 saat üçün 50 qəpik, gündəlik 5 manat müəyyən edilib".
***
Qax rayonunun İlisu kəndində yerləşən və turistlərin ən çox üz tutduğu Ramramay şəlaləsi ilə bağlı sosial şəbəkələrdə müzakirələr aparılır.
Shimal.News xəbər verir ki, yayılan iddialara görə, bu gündən etibarən şəlaləyə gedən hər bir ziyarətçidən yol haqqından əlavə 2 manat giriş haqqı alınır. Bildirilir ki, ödənişlər İlisu Dövlət Təbiət Qoruğu tərəfindən yığılır.
İddialar şəlalə istiqamətində fəaliyyət göstərən sürücülərin narazılığına səbəb olub. Sosial şəbəkələrdə yayılan görüntülərdə də bu məsələ ilə bağlı etirazlar səsləndirilir.
Məsələ ilə bağlı Shimal.News tərəfindən Ekologiya və Təbii Sərvətlər Nazirliyinə rəsmi sorğu ünvanlanıb. Qurumun mövqeyi əldə olunan kimi oxucularımıza təqdim ediləcək.
Qeyd edək ki, hazırda Azərbaycanın milli parklarına giriş bileti Azərbaycan vətəndaşları üçün 2 manat təşkil edir. Yüksək dağlıq ərazilərdə yerləşən bəzi milli parklarda isə giriş haqqı Azərbaycan vətəndaşları üçün 10 manat, yerli tələbələr üçün 8 manat, əcnəbilər və vətəndaşlığı olmayan şəxslər üçün isə 20 manat müəyyən edilib. Hazırda Ramramay şəlaləsinə tətbiq olunduğu iddia edilən ödənişin hansı hüquqi əsasla həyata keçirildiyi rəsmi şəkildə açıqlanmayıb.
