Qusarın dağlıq Ləzə kəndində palçıq selinin yaratdığı fəsadların aradan qaldırılması istiqamətində işlər davam etdirilir.
Yerli sakinlərin sözlərinə görə, ötən ilin sentyabr ayından etibarən təkrar müşahidə olunan palçıq axını Ləzəçayda ciddi problemlərə səbəb olub. Sel nəticəsində çayın məcrası dəyişib, kənd faktiki olaraq iki hissəyə bölünüb.
Bu ilin iyun ayında baş verən növbəti palçıq seli isə vəziyyəti daha da ağırlaşdırıb.
Hazırda Qusar Rayon İcra Hakimiyyətinin təşkilatçılığı ilə əraziyə cəlb olunan ağır texnika vasitəsi ilə Ləzəçayın məcrasının dərinləşdirilməsi işləri aparılır.
Sakinlərin bildirdiyinə görə, görülən tədbirlər qarşıdan gələn payız yağışları zamanı mümkün daşqın riskini azaltmaq, eləcə də gələcəkdə baş verə biləcək palçıq axınlarının yaşayış evlərinə yaxınlaşmasının qarşısını almaq məqsədi daşıyır.
Mənbə: Bizim.Media
