Ötən gün Qusar şəhəri, Çingiz Qurbanov küçəsində baş vermiş ağır yol qəzasında təcili tibbi yardım avtomobil minik avtomobillə toqquşub.
Shimal.News xəbər verir ki, nəticədə tibbi yardım maşınında olan həkim, tibb bacısı və sürücü, eləcə də digər maşının sürücüsü xəsarət alıb.
Shimal.News yaralıların son durumunu öyrənmək üçün TƏBİB-ə sorğu ünvanlayıb. Qurumdan sorğuya cavab olaraq bildirilib ki, hazırda vəziyyətləri orta-ağır olaraq qiymətləndirilir:
Onlardan avtomobilin sürücüsü olan 1980-ci il təvəllüdlü şəxsə (kişi cinsi) döş qəfəsi və bel nahiyəsinin əzilməsi, 1983-cü il təvəllüdlü tibb bacısı və 1988-ci il təvəllüdlü feldşerə (qadın cinsli) isə qapalı kəllə-beyin travması diaqnozları təyin olunub. Yaralılara zəruri ilkin tibbi yardım göstərilib və Cərrahiyyə şöbəsinə yerləşdiriliblər. Hazırda stasionar şəraitdə müalicələri davam etdirilir və vəziyyətləri orta-ağır stabil olaraq qiymətləndirilir.
Faktla bağlı araşdırma aparılır”.
Fidan İlqar
