Qusar rayonunda şəhid ailələrinə, Vətən müharibəsi qazilərinə və aztəminatlı ailələrə sosial dəstəyin göstərilməsi istiqamətində tədbirlər davam etdirilir.
Shimal.News məlumat verir ki, icra başçısı Sahir Məmmədxanov Həsənqala kəndində Vətən müharibəsi şəhidi Orxan İsmayılovun ailəsini ziyarət edib.
Ziyarət zamanı ailənin sosial-məişət şəraiti ilə yaxından tanışlıq olub. Onların gündəlik qayğı və ehtiyacları, mövcud problemləri öyrənilib. Həmçinin şəhidin yataq xəstəsi olan atası Qədim İsmayılovun səhhəti və müalicə prosesi barədə məlumat alınıb.
Daha sonra Atlıxan kəndində Vətən müharibəsi qazisi İlkin Abuyev və ailəsi ziyarət edilib. Görüş zamanı qazinin sağlamlıq vəziyyəti və ailəsinin sosial təminatı öyrənilib, onun mövcud problemləri və təklifləri dinlənilib.
Ardınca Sahir Məmmədxanov Əvəcük kəndində yaşayan 7 uşaqlı aztəminatlı ailə - Abbasov Babək Şirzad oğlunun ailəsinə baş çəkib. Ziyarət zamanı ailənin sosial vəziyyəti, yaşayış şəraiti və çoxuşaqlı ailə kimi üzləşdiyi çətinliklər yeri də öyrənilib. Uşaqlara geyim yardımı göstərilib, eyni zamanda yaşayış evinin təmirinə müvafiq köməklik edilib.
Ziyarət edilən ailələr onlara göstərilən diqqət və qayğıya görə minnətdarlıqlarını bildiriblər.
