Quba şəhərinin girişində yol hərəkətinin təşkilindəki nöqsanlar sürücülər üçün ciddi çətinliklər yaradıb.
Bu barədə Shimal.News-a müraciət edən sürücülər bildiriblər ki, ərazidə mövcud yol nişanlarının sayı və yerləşdirilməsi hərəkətin düzgün tənzimlənməsi üçün yetərli deyil.
Sürücülərin sözlərinə görə, xüsusilə qarlı və yağışlı havalarda asfalt üzərində çəkilmiş yol nişanlanmaları tamamilə görünməz olur. Qusar (SDK) istiqamətindən gələn nəqliyyat vasitələri M.P.Vaqif küçəsi ilə yol ayrıcına yaxınlaşarkən sola "baş yol" nişanı ilə qarşılaşır. Lakin yol ayrıcına daxil olduqda ilk döngədə hərəkətin əks istiqamətdə olduğu məlum olur və həmin istiqamətə dönmək mümkün deyil. Bu barədə xəbərdarlıq edən əlavə yol nişanı isə mövcud deyil.
Bundan əlavə, növbəti döngəyə daxil olmaq da mümkün olmur, çünki yolun üzərində təhlükəsizlik adacığı yerləşir. Yol ayrıcının davamında dairəvi hərəkət hissəsi olmasına baxmayaraq, bunu göstərən müvafiq yol nişanı quraşdırılmayıb. Nəticədə sürücülər sola döndükdə bilmədən əks hərəkət zolağına daxil olurlar.
Əraziyə ilk dəfə gələn sürücülər və qonaqlar üçün isə hərəkətin təşkilini anlamaq daha da çətinləşir. Mövcud vəziyyət həm qəza riskini artırır, həm də sürücülərin cərimələnməsi ilə nəticələnir.
Yaranmış vəziyyət onu göstərir ki, aidiyyəti qurumlar tərəfindən təcili tədbirlər görülməli, yol hərəkətinin aydın və təhlükəsiz təşkili təmin edilməlidir.
