Quba–Xaçmaz avtomobil yolu yenidən sürücülərin müzakirəsinə səbəb olub.
Shimal.News-a verilən məlumata görə, Xaçmaz rayonunun Armudpadar kəndi ərazisində yolun deformasiyaya uğramış hissələrinin təmirinə başlanılıb. Hazırda sıradan çıxmış asfalt örtüyü qazılaraq yenisi ilə əvəz edilir.
Lakin görülən işlərin ardıcıllığı sakinlərdə sual doğurub. Belə ki, cəmi iki həftə əvvəl həmin yolun üzərində üfüqi nişanlanma xətləri çəkilib. İndi isə eyni hissələr qazılaraq yenidən asfaltlanır.
Sakinlərin sözlərinə görə, yolun Xaçmaz rayonu ərazisindən keçən hissəsinə sonuncu dəfə təxminən 6 il əvvəl yalnız bir qat asfalt örtüyü salınıb. Həmin vaxt ikinci qatın sonradan çəkiləcəyi vəd edilsə də, bu günə qədər həmin iş görülməyib.
Vətəndaşlar təmir işlərinin başlanmasını müsbət qiymətləndirsələr də, əvvəlcə yol nişanlanmasının aparılması, ardınca isə asfaltın qazılmasının planlaşdırma baxımından məntiqi görünmədiyini bildirirlər. Onlar hesab edirlər ki, yol əvvəlcə tam təmir edilməli, yalnız bundan sonra nişanlanma xətləri çəkilməli idi.
