Quba şəhərindən Qəçrəş istiqamətində yerləşən meşəlik ərazidə növbəti təmizlik aksiyası keçirilib.
Shimal.News xəbər verir ki, aksiya avqustun 7-də Quba Rayon İcra Hakimiyyəti və Quba Regional Turizm İdarəsinin birgə təşkilatçılığı ilə baş tutub.
Tədbirdə Quba Rayon İcra Hakimiyyətinin başçısı İlqar Mahmudov, icra hakimiyyətinin kollektivi, Quba Regional Turizm İdarəsinin, Quba-Xaçmaz Regional Gənclər və İdman İdarəsinin rəhbərliyi və əməkdaşları, Quba "ASAN xidmət" Mərkəzinin könüllüləri, həmçinin "Təmiz Quba" Mənzil Kommunal Təsərrüfat Birliyinin əməkdaşları iştirak ediblər.
Aksiya zamanı meşə zolağı müxtəlif məişət tullantılarından təmizlənib, ərazinin sanitar-gigiyenik vəziyyətinin yaxşılaşdırılması istiqamətində işlər görülüb.
Bildirilib ki, aksiyanın əsas məqsədi ətraf mühitin tullantılarla çirkləndirilməsinin qarşısını almaq, ekoloji maarifləndirməni gücləndirmək və vətəndaşlarda təbiətə məsuliyyətli münasibət formalaşdırmaqdır.
