Qəbələdə 8 Mart – Beynəlxalq Qadınlar Günü münasibətilə #LevelUP Forumu təşkil olunub.
Shimal.News xəbər verir ki, tədbir çərçivəsində "Glow & Grow" paneli iştirakçılar tərəfindən böyük maraqla qarşılanıb. Müzakirələrdə dinləyicilər də fəal iştirak edərək spikerlərlə fikir mübadiləsi aparıblar.
Tədbir Gənclərin İnkişaf və Karyera Mərkəzinin Dağlıq Şirvan regional nümayəndəliyinin Qəbələ bölməsi, Qəbələ Dövlət Peşə Təhsil Mərkəzi və Ailə, Qadın və Uşaq Problemləri üzrə Dövlət Komitəsinin tabeliyində fəaliyyət göstərən Qəbələ Uşaq və Ailələrə Dəstək Mərkəzinin birgə təşkilatçılığı ilə keçirilib. Forumun tərəfdaşlarından biri də Qəbələ Rayon Mərkəzləşdirilmiş Kitabxana Sisteminin 2 saylı kitabxana filialı olub.
Panel müzakirələri zamanı qadın liderliyi, təhsil və karyera inkişafı, sahibkarlıq imkanları və peşəkar yüksəliş mövzularında fikir mübadiləsi aparılıb. Spikerlər öz uğur hekayələrini bölüşərək gənc xanımlara motivasiya verib və praktiki tövsiyələr təqdim ediblər.
Qeyd olunub ki, forum gənc xanımlar üçün həm maarifləndirici, həm də şəbəkələşmə baxımından faydalı platforma rolunu oynayıb.
