Bu ilin aprel–may aylarında yağan intensiv yağışlar Azərbaycanın dağlıq ərazilərində sürüşmə proseslərini aktivləşdirib. Mütəxəssislər xüsusilə Qəbələ rayonu və Lahıc istiqamətində vəziyyətin diqqətlə izlənilməsinin vacibliyini bildirirlər.
AZƏRTAC-a açıqlamasında coğrafiya elmləri doktoru, dosent Nəriman Paşayev qeyd edib ki, son aylarda müşahidə olunan güclü yağıntılar torpaq qatının həddindən artıq nəmlənməsinə, yamac eroziyasının sürətlənməsinə və sürüşmə riskinin artmasına səbəb olub.
Alimin sözlərinə görə, ən ciddi təsirlərdən biri Qəbələ rayonunda qeydə alınıb. Güclü yağışlardan sonra yüksək dağətəyi ərazilərdə torpaq qatının hərəkəti nəticəsində kəndlərarası yolların bəzi hissələrində çatlar və çökmələr yaranıb, yaşayış evlərinin həyətyanı sahələrində deformasiyalar müşahidə olunub.
Xüsusilə Vəndam, Bum, Tikanlı və Nic istiqamətlərində yamac eroziyası daha da güclənib. Nəticədə bəzi kənd təsərrüfatı sahələri yararsız vəziyyətə düşüb, meyvə bağları, fındıq və qoz plantasiyalarına ziyan dəyib, suvarma sistemlərinin müəyyən hissələri sıradan çıxıb.
Diqqət çəkən digər ərazi isə Lahıc istiqamətidir. Nəriman Paşayev bildirib ki, Lahıc yolunda dağ yamaclarından qopan torpaq və qaya parçaları kommunikasiya xətləri və nəqliyyat infrastrukturu üçün təhlükə yaradıb. Bölgədə geodinamik proseslərin aktivləşməsi mütəxəssisləri narahat edir.
Alim hesab edir ki, son hadisələr Qəbələ və Lahıc kimi dağətəyi yaşayış məntəqələrində sürüşmə risklərinin daha ciddi şəkildə qiymətləndirilməsini, riskli ərazilərdə isə daimi monitorinqin aparılmasını zəruri edir.
