Xaçmaz şəhərinin mərkəzi arteriyalarından sayılan M.Ə. Rəsulzadə küçəsinin bir hissəsində təhlükəli vəziyyət yaranıb.
Sakinlərin Shimal.News-a verdiyi məlumata görə, küçənin bu hissəsində hərəkət zolağı kəskin daralır, səkilər isə ümumiyyətlə mövcud deyil. Nəticədə piyadalar məcbur qalaraq yolun hərəkət hissəsi ilə hərəkət edirlər. Küçə boyunca uzanan qaz xətti də piyadaların keçidini məhdudlaşdırır və yolun kənarından təhlükəsiz istifadə imkanını azaldır. Bu səbəbdən insanlar real təhlükə ilə üz-üzə qalırlar.
Xüsusilə axşam saatlarında və nəqliyyatın intensiv olduğu vaxtlarda risk daha da artır. Sakinlər bildirirlər ki, ərazidəki vəziyyət uzun müddətdir ictimai müzakirə mövzusu olsa da, problemin həlli istiqamətində konkret addım atılmayıb.
Mövcud vəziyyət həm yol hərəkəti təhlükəsizliyi, həm də piyadaların həyatı üçün ciddi risk yaradır. Yerli əhali küçədə daralmanın səbəblərinin araşdırılmasını və təhlükəsiz hərəkətin təmin olunmasını zəruri hesab edir.
