Asəf Ağayev hər birimizin yaddaşına Qarabağın azad edilmiş torpaqlarından, xüsusilə Şuşadan çəkdiyi videolarla həkk olunub. Onun videolardakı gülər üzü, səmimi zarafatları, qürurlu yerişi, şirin Qax ləhcəsi və tez-tez səsləndirdiyi "Yaşasın spesnaz!" ifadəsi bu gün də qulaqlarımızda yaşayır. O, təkcə döyüşçü deyildi - o, qələbənin ruhu idi.

Ağayev Asəf Abid oğlu 24 noyabr 1993-cü ildə Qax şəhərində dünyaya gəlib. Uşaqlıqdan hərb sənətinə böyük maraq göstərən Asəf 9-cu sinfi bitirdikdən sonra Cəmşid Naxçıvanski adına Hərbi Liseydə təhsil alıb. Daha sonra Heydər Əliyev adına Bakı Ali Hərbi Akademiyasını müvəffəqiyyətlə başa vuraraq Azərbaycan Ordusunun zabiti kimi xidmətə başlayıb. Beş dil bilən Asəf bilik və peşəkarlığı ilə seçilən XTQ zabitlərindən biri olub.

Onun hərb sevgisinin kökündə atası - Birinci Qarabağ müharibəsinin iştirakçısı Abid Ağayevin Vətənə bağlılığı dayanırdı. Asəf də atasının yolunu şərəflə davam etdirdi.

Vətən müharibəsinin ilk günlərindən döyüşə atılan Asəf Ağayev Füzulidən Şuşaya qədər şərəfli döyüş yolu keçdi. Müharibədən sağ çıxmasına görə ailəsi qurban kəsmişdi. O, 16 dekabrda məzuniyyətə qayıtmalı idi. Lakin erməni silahlı dəstələrinin törətdiyi təxribat səbəbindən yenidən xidmət yerinə döndü. Ailəsi ilə son yazışmasında Qarabağda qalan düşmən silahlılarının zərərsizləşdirilməli olduğunu bildirmişdi.

Asəf ailəsinə qayıtdı…
Amma 18 dekabrda - şəhid kimi.

17 dekabr 2020-ci ildə, Qarabağda antiterror tədbirləri zamanı Xocavənd rayonunda hərəkətdə olduğu avtomobilin minaya düşməsi nəticəsində Asəf Ağayev şəhid oldu. Bu xəbər təkcə ailəsini deyil, bütün Azərbaycanı sarsıtdı. Çünki Asəf artıq xalqın sevimlisinə çevrilmişdi.

Onun şəhadəti xəbəri ildırım sürətilə yayıldı, hətta ölkə hüdudlarını aşaraq Türkiyədə belə böyük ehtiramla qarşılandı. Minlərlə insan onu son mənzilə yola salmaq üçün bir araya gəldi.

Şuşa cəngavəri Asəf Ağayev doğma Qax şəhərinin Şəhidlər Xiyabanında — özünün dediyi kimi, "igidlərin yatdığı yerdə" dəfn olundu.

Qəhrəman zabitimiz şəhid olduqdan sonra "Cəbrayılın azad olunmasına görə" və "Şuşanın azad olunmasına görə" medalları ilə təltif edilib.

Asəf Ağayev yaşadığı kimi - qürurla, dik duruşla və Vətənə sədaqətlə yaddaşımızda əbədi qalacaq.

Ruhu şad olsun. Unudulmur, unudulmayacaq.