Qax rayonunda "İçəribazar" qala kompleksi ərazisində Aqrar Biznes Festivalı təşkil olunub.
Shimal.News xəbər verir ki, festival "Qax Günləri" çərçivəsində yerli icra hakimiyyəti və Kənd Təsərrüfatı Nazirliyinin Aqrar İnnovasiya Mərkəzi ilə birgə təşkil edilib.
Festivalda rayonun kənd təsərrüfatı məhsulları, yerli istehsal nümunələri, müasir aqrar texnologiyalar və innovativ avadanlıqlar nümayiş etdirilib. Ziyarətçilər fermerlərə göstərilən dövlət dəstəyi, subsidiya mexanizmləri və aqrar sahədə tətbiq olunan yeniliklər barədə də məlumatlandırılıblar.
Tədbirdə çıxış edən rəsmilər festivalın yerli istehsalın təşviqi, fermerlərlə dövlət və özəl sektor arasında əməkdaşlığın genişləndirilməsi, eləcə də Qaxın aqrar və turizm potensialının tanıdılması baxımından əhəmiyyətini vurğulayıblar.
Qeyd edək ki, Qaxda keçirilən tədbir Aqrar İnnovasiya Mərkəzinin təşkil etdiyi sayca 95-ci Aqrar Biznes Festivalı olub.
