Şəki Ağır Cinayətlər Məhkəməsində insan alverində təqsirləndirilən Səmayə Səlimovanın (ad və soyad şərtidir) cinayət işi üzrə məhkəmə istintaqı başa çatıb.
İttihama görə, Səmayə Səlimova iki qadına Türkiyədə restoran işi vəd edərək onları aldadıb və Adana şəhərinə aparıb. Qadınların burada hədələnərək cinsi istismara məruz qoyulduğu iddia edilir.
Həmçinin təqsirləndirilən şəxsin insan alveri qurbanlarından birinin pasportunu götürərək özündə saxladığı bildirilir.
Lakin Şəki Ağır Cinayətlər Məhkəməsi işin mahiyyəti üzrə araşdırma aparmayıb. Məhkəmə müəyyən edib ki, ittiham olunan əməllərin əsas hissəsi Türkiyə ərazisində törədilib. Səmayə Səlimovanın xaricə getməzdən əvvəl sonuncu yaşayış yeri Gəncə şəhəri olub.
Bu səbəbdən cinayət işi məhkəmə aidiyyəti üzrə Gəncə Ağır Cinayətlər Məhkəməsinə göndərilib.
Təqsirləndirilən şəxs barəsində seçilmiş həbs qətimkan tədbiri də qüvvədə saxlanılıb.
Qeyd: Səmayə Səlimova hələ məhkəmə hökmü ilə təqsirli bilinməyib.
Mənbə: Pravda.az
