İsmayıllı Su Meliorasiya Sistemlərinin İstismarı İdarəsində çalışan bir neçə əməkdaş işdən azad edilib.
Həmin şəxslər iddia edirlər ki, onlara işdən çıxarılmaları ilə bağlı əsaslı və qanuni izahat verilməyib. Uzun illər idarədə müxtəlif vəzifələrdə çalışan əməkdaşlar hazırda çarəsiz vəziyyətdə qalıblar.
Bəzilərinin pensiya yaşına çatmasına isə cəmi bir neçə il qalıb. Onlar bildirirlər ki, əmək müqavilələri uzadılmayıb, lakin bunun səbəbi barədə onlara məlumat verilməyib.
Məsələ ilə bağlı İsmayıllı Su Meliorasiya Sistemlərinin İstismarı İdarəsindən bildirilib ki, həmin şəxslərlə bağlanmış əmək müqavilələrinə Əmək Məcəlləsinin müvafiq maddəsinə əsasən, müddətin başa çatması ilə əlaqədar xitam verilib. Eyni əsasla, 3 aylıq müddətli əmək müqaviləsi ilə çalışan şəxslərlə də əmək münasibətlərinə son qoyulub.
Qurumdan qeyd olunub ki, bütün hallarda əmək münasibətlərinə xitam verilməsi qüvvədə olan qanunvericiliyin tələblərinə uyğun şəkildə həyata keçirilib.
Video: XəzərXəbər
