Quba–Qəçrəş avtomobil yolunda növbəti dəfə çalaların yamaqlanmasına başlanılıb. Uzun müddətdir bərbad vəziyyətdə olan yolda yaranan iri və dərin çalalar sürücülərin hərəkətini çətinləşdirirdi.
Shimal.News-a verilən məlumata görə, təmir işlərinə Qəçrəş kəndinin içindən start verilib və hazırda yamaqlama meşəlik ərazi istiqamətində davam edir.
Sürücülər bildirirlər ki, yolun ən problemli hissələri məhz bu ərazidir. Yağışlar və qış mövsümündən sonra asfalt örtüyü daha da sıradan çıxır, dərin çalalar isə həm avtomobillərə ziyan vurur, həm də qəza riskini artırır.
Sakinlərin sözlərinə görə, bu yolda son əsaslı təmir uzun illər əvvəl aparılıb. Sonra isə yalnız yamaq üsulu ilə bərpa işləri görülüb. Bu həll uzunömürlü olmur – qısa müddətdə yamaqlar yenidən dağılır.
Sürücülər hesab edirlər ki, belə əhəmiyyətli marşrut üçün yamaq işləri kifayət etmir. Yolun müasir standartlara uyğun şəkildə əsaslı təmir olunması, eyni zamanda yağış və qar sularının asfaltı sıradan çıxarmaması üçün drenaj sisteminin qurulması vacibdir.
Vətəndaşlar aidiyyəti qurumları problemin müvəqqəti deyil, köklü həllinə nail olmağa çağırırlar.
