Ölkənin şimal-qərb bölgəsində avtomobil yollarında nəzarətsiz buraxılan ev heyvanları, xüsusilə atlar sürücülər üçün ciddi təhlükə mənbəyinə çevrilib.
Shimal.News xəbər verir ki, Oğuz rayonunun, o cümlədən şəhər ərazisinin yollarında gecə saatlarında atların nəzarətsiz şəkildə yollara çıxması qəza risklərini artırır.
Sakinlər bildirirlər ki, avtomobilin qarşısına qəfil çıxan atı vurmamaq üçün sürücülər kəskin əyləc verməli olur və ya son anda istiqamətini dəyişərək qəzadan yayınmağa çalışır. Bəzən isə sürücülər məcbur qalaraq asfalt örtüklü yoldan kənara çıxır, bu isə əlavə təhlükə yaradır.
Yerli əhalinin sözlərinə görə, Oğuz rayonunda dəfələrlə belə hadisələr baş verib və nəticədə avtomobillərə ciddi ziyan dəyib, bəzi hallarda isə sürücülər qəzadan yayına bilməyiblər.
Bu vəziyyət təkcə Oğuz rayonunda deyil, həmçinin İsmayıllı-Qaraməryəm-Şəki, Şəki-Oğuz və rayonun digər daxili yollarında da müşahidə olunur. Sürücülər deyirlər ki, belə yollarda avtomobil idarə etmək çətinləşir və onlar özlərini təhlükə qarşısında çarəsiz hiss edirlər.
Onlar əsas məsuliyyəti atları nəzarətsiz buraxanlarda görürlər.
