Niderlandın Azərbaycandakı səfirliyi Şəkidə dağlıq ərazidə yürüş zamanı xəsarət alan ölkə vətəndaşının xilas edilməsinə və təxliyəsinə görə Azərbaycanın aidiyyəti qurumlarına təşəkkür edib.
Shimal.News xəbər verir ki, bu barədə səfirliyin rəsmi "X" hesabında paylaşım edilib.
Bildirilib ki, avqustun 29-da Şəkinin dağlıq ərazisində yürüş zamanı xəsarət alan Niderland vətəndaşının xilas edilməsi və təcili tibbi yardımla təmin olunmasında Azərbaycanın aidiyyəti qurumlarının operativ reaksiyası yüksək qiymətləndirilir.
Səfirlik xüsusilə mürəkkəb dağlıq ərazidə və qaranlıq şəraitdə həyata keçirilən xilasetmə əməliyyatına diqqət çəkib.
Həmçinin yaralının helikopterlə operativ şəkildə təxliyə edilməsinə və hadisə yerində ilkin tibbi yardım göstərilməsinə görə Dövlət Sərhəd Xidmətinə təşəkkür bildirilib.
Səfirlik Şəki Rayon Mərkəzi Xəstəxanası və Bakıda yerləşən "Yeni Klinika"da göstərilən tibbi yardımı, peşəkar yanaşmanı və operativ müdaxiləni də yüksək qiymətləndirib.
Qeyd edək ki, xarici turistin dağlıq ərazidə xəsarət alması ilə bağlı hadisə avqustun 29-da baş verib.
