Zaqatala rayonunun Muxax kəndində ötən əsrin 80-ci illərində çəkilən su xətləri istismar müddətini başa vurub, mövcud filtrlər isə yararsız vəziyyətə düşüb.
Bizim.Media-nın məlumatına görə, mənbəyini Böyük Qafqazdan götürən Muxaxçay xüsusilə yaz və payız aylarında yağıntılar zamanı lilli və bulanıq olur. Əhali sayı təxminən 10 min nəfər olan Muxax və qonşu Zəyəm kəndlərinin içməli su təminatı məhz bu çaydan həyata keçirilir.
Sakinlərin bildirdiyinə görə, son illər sel və daşqınlar zamanı suyun içinə çör-çöp və tullantılar qarışır, bu da suyu içilməz hala salır. Kənddə köhnəlmiş xətlər və sıradan çıxan filtrlər vəziyyəti daha da çətinləşdirib.
Muxax sakinləri su xəttinin nəzarətə götürülməsini, yeni layihənin hazırlanmasını və su mənbəyində müasir filtrlərin quraşdırılmasını tələb edirlər.
Kənd icra nümayəndəsi Səlahəddin Adamov bildirib ki, mövcud xətlər və su anbarları 1980-ci illərdə inşa olunub və son yağışlar filtr problemlərini üzə çıxarıb. Onun sözlərinə görə, Su Meliorasiya Sistemlərinin İstismarı İdarəsinin köməyi ilə problem müvəqqəti olaraq aradan qaldırılıb və hazırda borcların mərhələli yığılması, eləcə də yeni işlərin başlanması üçün müvafiq qurumlarla razılaşmalar aparılır.
Zaqatala Su Meliorasiya Sistemlərinin İstismarı İdarəsindən isə bildirilib ki, yaranan problem qısa müddətdə həll olunub və yaxın dövrdə vəsait toplandıqdan sonra əsaslı işlərə başlanması nəzərdə tutulur.
