Paytaxtımızı şimal-qərb rayonları ilə birləşdirən ən qısa Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsinin yenidən qurulması davam edir.
ShimalNews “Azərtac”-a istinadən məlumat verir ki, artıq yolda əsas işlərin tamamlandığı hissələrə asfalt döşənir. Digər yerlərdə isə torpaq işləri icra olunur, hərəkət hissəsi genişləndirilir, yararsız qrunt qazılaraq çıxarılır, əks-dolğu işləri icra edilərək yeni yol yatağı salınır, istinad divarları və suötürücü borular tikilir. İyirmi kilometrə yaxın hissədə isə torpaq yatağının inşası başa çatıb.
Bu yolun tikintisi başa çatdıqdan sonra bölgədə turizmin inkişafına da böyük töhfə olacaq. Həmçinin yolun ümumi uzunluğu 10 km-ə qədər qısalacaq.
Layihələndirilən yolun 4.5-ci kilometrliyində, Ağsu çayı üzərində 1195 m uzunluqda və 76.5 metr hündürlüyündə asma körpünün inşası üzrə ümumilikdə işlərin 39.6 faizi yekunlaşıb. Körpünün dayaqlarında qazma və svay bərkitmə işləri, həmçinin dayaqların bəzilərində bünövrələrin tikintisi aparılıb. Hazırda onların gövdə hissələrinin inşası icra olunur.
Ümumilikdə yeni layihə üzrə 1 tunel, 1 asma körpü, 21 körpü layihələndirilib. Belə ki, Girdmançay, Talıstançay, Ax-ox çayı, Göyçay çayı və Vəndamçay üzərində yerləşən 5 mövcud körpü 4 zolağa uyğun yenidən qurularaq genişləndirilir. Ağsuçay, Gülyançay və Dəmiraparançay çayları üzərində yerləşən 3 körpü isə 4 zolağa uyğun yenidən layihələndirilib. Artıq Gülyançay və Qurudərə çayları üzərində körpülərin tikintisi başa çatıb. Digər körpülərin inşası üzrə işlər davam edir.
Qeyd edək ki, ötən əsrin 70-ci illərində Ulu Öndər Heydər Əliyevin təşəbbüsü ilə salınmış bu yolun yenidən qurulması Prezident İlham Əliyevin verdiyi tapşırığa əsasən layihələndirilib.
