Bu gün Azərbaycanın şəhid telejurnalisti, Milli Qəhrəmanı Çingiz Mustafayevin doğum günüdür.
Əslən Şəkidən olan Çingiz Fuad oğlu Mustafayev 29 avqust 1960-cı ildə Həştərxan vilayətinin Kapustin-Yar qəsəbəsində hərbçi ailəsində anadan olub. 1964-cü ildə ailəsi ilə birlikdə Bakıya köçüb.
O, əvvəlcə hərbi təhsil alıb, daha sonra Azərbaycan Tibb İnstitutunda oxuyaraq 1983-cü ildə həkim ixtisasına yiyələnib. Təyinatla Dəvəçi rayonunda – indiki Şabran ərazisində üç il həkim işləyib.
Çingiz Mustafayevin həyatında 1990-cı ilin 20 Yanvar hadisələri dönüş nöqtələrindən biri oldu. O, Bakıda baş verən faciəni lentə alaraq hadisələrin dünyaya çatdırılmasında mühüm rol oynadı. 1991-ci ildən Azərbaycan Dövlət Televiziyasında reportyor kimi fəaliyyət göstərməyə başladı.
Qarabağ müharibəsi başlayanda isə kamera qarşısında deyil, cəbhənin özündə oldu. Onun reportajları döyüş bölgəsində baş verənləri operativ şəkildə Azərbaycan tamaşaçısına və beynəlxalq auditoriyaya çatdırırdı. Xüsusilə Xocalı faciəsindən sonra çəkdiyi görüntülər Azərbaycanın üzləşdiyi faciənin dünyaya göstərilməsi baxımından böyük əhəmiyyət daşıyırdı.
Çingiz Mustafayev yalnız jurnalist deyildi. Gənclik illərində yenilikçi fəaliyyəti ilə də seçilib: 1970-ci illərdə SSRİ-də və Azərbaycanda ilk disko-klublardan birini yaradıb və Azərbaycanın ilk DJ-lərindən biri kimi tanınıb.
1992-ci il iyunun 15-də Çingiz Mustafayev Qarabağda, Naxçıvanik kəndi istiqamətində çəkiliş apararkən mərmi qəlpəsi ilə ağır yaralanıb və 31 yaşında şəhid olub.
Ölümündən sonra, 6 noyabr 1992-ci il tarixli fərmanla "Azərbaycanın Milli Qəhrəmanı" adına layiq görülüb.
Onun kamerası ilə çəkilən kadrlar, reportajları və cəbhədən hazırladığı materiallar bu gün də Azərbaycanın müharibə tarixinin mühüm sənədləri sırasında yer alır.
Çingiz Mustafayevin ömrü qısa oldu, amma onun kamerası Azərbaycan tarixinin ən ağır günlərini yaddaşlara yazdı.
