Azərbaycanda səfərdə olan Müqəddəs Taxt-Tacın Dinlərarası Dialoq Dikasteriyasının prefekti, Kardinal Corc Kuvakad iyunun 17-də Şəkiyə səfər edib.
Shimal.News xəbər verir ki, ali qonağı Azərbaycanın Müqəddəs Taxt-Tacdakı səfiri İlqar Muxtarov və Qafqaz Müsəlmanları İdarəsi sədrinin müavini, Hacı Salman Musayev müşayiət ediblər.
Səfər çərçivəsində nümayəndə heyəti Şəki Xan Sarayı, Kiş Alban Kilsəsi və digər tarixi-memarlıq abidələri ilə tanış olub. Qonaqlara Şəkinin zəngin tarixi, memarlıq irsi və bölgədə qorunub saxlanılan xristian abidələri barədə məlumat verilib.
Kardinal Corc Kuvakad Azərbaycanda bu günədək qorunub saxlanılan xristian irsinin ölkədə mövcud olan dini dözümlülük və multikultural mühitin göstəricisi olduğunu vurğulayıb.
Səfərin sonunda Şəki Şəhər İcra Hakimiyyətinin başçısı Elxan Usubov tərəfindən ali qonağa xatirə hədiyyələri təqdim olunub.
Qeyd edək ki, nümayəndə heyətinin iyunun 18-də Qəbələ şəhərinə səfəri planlaşdırılır. Bundan əvvəl Kardinal Corc Kuvakad İlham Əliyev ilə görüş keçirərək Azərbaycan–Vatikan münasibətlərini müzakirə edib.
