Şəkinin Daşbulaq kənd orta məktəbinin bağlanması ilə bağlı AÇIQLAMA
Məsələ ilə bağlı Şəki-Zaqatala Regional Təhsil İdarəsindən bildirilib ki, Şəki rayonu Daşbulaq kənd ümumi orta məktəbinin bağlanması ilə bağlı yayılan məlumatlar həqiqəti əks etdirmir:
"Bildiririk ki, 2026–2027-ci tədris ilindən etibarən yüksəkixtisaslı müəllim təminatında çətinlik müşahidə olunan bəzi fənlər üzrə tədrisin həmin təhsil müəssisəsində onlayn formatda, müəllimlərin sertifikatlaşdırılması prosesində yüksək nəticə göstərmiş ixtisaslı pedaqoqlar tərəfindən təşkili nəzərdə tutulur.
Qeyd edirik ki, bu dəyişiklik təhsil müəssisəsinin fəaliyyətinə təsir göstərmir. Məktəbin pedaqoji və texniki heyətinin əmək münasibətlərində hər hansı ixtisar nəzərdə tutulmur".
***
Şəkinin Daşbulaq kənd orta məktəbinin bağlanacağı və şagirdlərin distant təhsilə keçiriləcəyi iddia edilir.
Bu barədə jurnalist Zülfiyyə Quliyeva sosial şəbəkə hesabında paylaşım edib.
Onun sözlərinə görə, Elm və Təhsil Nazirliyi kənddə şagird sayının az olmasını əsas gətirərək məktəbin fəaliyyətini dayandırmağı planlaşdırır. Bildirilir ki, hazırda məktəbdə 29 şagird təhsil alır. Halbuki, 1990-cı illərin sonlarınadək burada 100-dən çox şagird oxuyub.
Z.Quliyeva qeyd edib ki, kənddə yolların yararsız vəziyyətdə olması şagirdlərin başqa yaşayış məntəqələrində təhsil almasını çətinləşdirir. O, həmçinin vurğulayıb ki, Daşbulaqda dövlət vəsaiti hesabına 400 min manata 80 yerlik modul tipli məktəb binası tikilib.
Jurnalistin fikrincə, məktəbin bağlanması yalnız təhsil məsələsi deyil, həm də kəndin gələcəyinə təsir göstərəcək addımdır. O bildirib ki, təhsil ocağının fəaliyyətini dayandırması müəllimlərlə yanaşı, texniki işçilərin də işsiz qalmasına səbəb ola bilər və bu, kənddən köç prosesini sürətləndirə bilər.
Paylaşımda Elm və Təhsil Nazirliyinə müraciət edilərək, məktəbin bağlanması ilə bağlı qərarın yenidən nəzərdən keçirilməsi istənilib.
