İsmayıllı şəhərində anadan olan Azərbaycan Ordusunun leytenantı Elnur Səmədov 2022-ci il sentyabrın 12-də Ermənistan Silahlı Qüvvələrinin genişmiqyaslı təxribatının qarşısının alınması zamanı şəhid olub.
Shimal.News xəbər verir ki, Elnur Səmədov 1988-ci il martın 11-də İsmayıllı şəhərində anadan olub. Sumqayıt Dövlət Universitetini bitirib. Ailəli olan şəhidin bir oğlu və bir qızı olub.
O, 2020-ci ilin sentyabr-noyabr aylarında Vətən müharibəsi zamanı Murovdağ, Cəbrayıl və Füzuli istiqamətlərində gedən döyüşlərdə iştirak edib.
Vətən müharibəsində göstərdiyi xidmətlərə görə Prezident İlham Əliyevin sərəncamları ilə "Azərbaycan Bayrağı" ordeni, "Cəbrayılın azad olunmasına görə", "Füzulinin azad olunmasına görə" və "Kəlbəcərin azad olunmasına görə" medalları ilə təltif edilib.
Elnur Səmədov 2022-ci il sentyabrın 12-də Ermənistan Silahlı Qüvvələrinin törətdiyi təxribatın qarşısının alınması zamanı döyüşlərdə şəhid olub.
Azərbaycanın ərazi bütövlüyünün bərpası uğrunda döyüş əməliyyatlarında göstərdiyi igidlik və mərdliyə, hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyinə görə ölümündən sonra 3-cü dərəcəli "Rəşadət" ordeni və "Vətən uğrunda" medalı ilə təltif edilib.
