Quba-Xaçmaz Regional Məşğulluq filialının təşkilatçılığı ilə 11 sentyabr 2026-cı il tarixində Siyəzən şəhərində əmək yarmarkası keçiriləcək.
Shimal.News xəbər verir ki, əmək yarmarkasında 7 dövlət və özəl müəssisə üzrə ümumilikdə 74 vakansiya işsiz və işaxtaran şəxslərin diqqətinə təqdim olunacaq. Tədbirdə iştirak edən namizədlər mövcud vakansiyalar, iş öhdəlikləri və əmək şəraiti barədə ətraflı məlumat əldə edə biləcəklər.
Yarmarkada iştirak etmək istəyən namizədlərin şəxsiyyət vəsiqəsini özləri ilə gətirməsi mütləqdir. Həmçinin namizədlərin CV nümunəsi ilə gəlməsi tövsiyə olunur.
Qeyd edək ki, əmək yarmarkası Siyəzən şəhəri, Heydər Əliyev prospekti 90-da (Heydər Əliyev Mərkəzi) 11 sentyabr saat 11:00-da keçiriləcək.
