Göyçayın Yekəxana və Şahsultanlı kəndlərinin sakinləri bir aydan çoxdur suvarma suyunun rəngi və qoxusunun dəyişməsindən narazıdırlar.
Sakinlərin sözlərinə görə, Yekəxana su anbarından kəndlərə verilən su köpüklənir, kəskin qoxu verir və istifadəyə yararsız hala düşüb. Onlar suvarma ilə yanaşı, məişətdə də çətinlik yaşadıqlarını bildirirlər.
Məsələ ilə bağlı Göyçay Meliorasiya Sistemlərinin İstismarı İdarəsindən bildirilib ki, problemin səbəblərinin müəyyənləşdirilməsi üçün araşdırmaya başlanılıb. Su anbarına və kəndlərdəki suvarma kanallarına baxış keçirilib, müxtəlif nöqtələrdən su nümunələri götürülərək laborator analizə göndərilib.
İdarənin baş mühəndisinin sözlərinə görə, ilkin baxış zamanı ciddi problem aşkarlanmayıb. Suyun rəng və qoxusunun dəyişməsinin səbəbi laboratoriya nəticələrindən sonra məlum olacaq.
Ətraflı İTV-nin videosunda.
